機械手錶

機械錶無電子錶咁準。機械錶仲貴過電子錶。機械錶久唔久要抺油。

不過我都係鍾意戴機械錶。

關於抺油或者整錶，經過咁多年經驗，我已經唔會再攞去比代理或者大錶行整。又經過咁多年明查暗訪實戰經驗，我發現九龍城有一位隱世高手。大道隱於市之又一例證。佩服，佩服。

山西錢莊

中國金融中心

日昇昌曾經係中國最大票號，當年八國聯軍，好多乜乜物物陪款都係經佢匯去外國。

時至今日，真係乜都過眼雲煙咯。不過認識中國，就真係要先了解歷史。

汰強留弱

返工係應該做嘢，唔係玩嘢。

除非你立志返工係玩嘢，並以此為生。

咁Admin同HR就真係要多謝你啦。

無你汰強留弱，佢地邊有嘢做。

咁又話說回頭，唔怪之得Admin同HR咁鍾意玩嘢。

當一處地方變得危機重重，都係不宜久留。

所謂君子不立危牆下。

去第二度再比心機做嘢，第二日都係自己得益。

所以我今日辭左職。

安居之所

如果一個門牌等如一個信箱。
一個信箱等如一個居住單位。
一個單位等如一個家庭。
咁一個家庭等如乜野呢。
我真係唔識答。
希望唔會係一個家庭等如一個門牌啦。
不過一層樓劏房之後，好大可能等如一屋四伙八個姓氏七國咁亂就應該無錯啦。
當安居樂業由理想變成幻想，咁仲可以點。
其實香港人有時都幾無奈。

好睇唔好食

係呀，過年盤吉睇吓就幾靚，但係你試吓食入口，真係幾難頂。

好睇唔好食，其實香港都係一樣。

就講民生保障，唔使去過紐西蘭都知。

你試吓比較香港同紐西蘭外匯儲備有幾多，GDP有幾多。

你又試睇吓香港最低工資，得時薪港幣28蚊。

而紐西蘭最低工資，有時薪紐幣13蚊，按今日匯率計（1對6.4），即係有港幣83蚊，即係多你兩倍左右。

矣，早輪睇見班政棍仲係度講緊28蚊問題，真係得啖笑。

咁搞法，所謂東方之珠可能都係得個吉，好睇唔好食。

花無百日紅

如果過年出多一個月人工，叫做「花紅」。即係你對公司仲有利用價值。
如果過年出多一個月人工，叫「代通知金」。即係你對公司已經無利用價值。
如果無「花紅」又無「代通知金」。
即係你對公司仲有利用價值，但係公司對你已經無利用價值。
咁你話應該點算呢。